ડભોઈ પ્રતિબંધ છતાં સિંગલ યુઝ પ્લાસ્ટિકનો ધૂમ વપરાશ, નગરપાલિકા ત્રાટકી; ૨૨ કિલો જથ્થો જપ્ત ડભોઈ સરકાર દ્વારા સિંગલ યુઝ પ્લાસ્ટિક પર સંપૂર્ણ પ્રતિબંધ લાદવામાં આવ્યો હોવા છતાં, ડભોઈ નગરમાં કેટલાક વેપારીઓ દ્વારા બેરોકટોક તેનો ઉપયોગ ચાલુ રાખવામાં આવ્યો હતો. આ બાબતને ગંભીરતાથી લઈને ડભોઈ નગરપાલિકા તંત્ર દ્વારા ઓચિંતું ચેકિંગ હાથ ધરી કડક કાર્યવાહી કરવામાં આવી છે.નગરપાલિકાની ટીમ દ્વારા સપાટોનગરપાલિકાના ચીફ ઓફિસર જયકિશન તડવી અને પ્રમુખના માર્ગદર્શન હેઠળ એક ખાસ ટીમ તૈયાર કરવામાં આવી હતી. આ ટીમ દ્વારા નગરના મુખ્ય બજાર અને વિવિધ વિસ્તારોમાં આવેલી દુકાનોમાં આકસ્મિક તપાસ હાથ ધરવામાં આવી હતી. તપાસ દરમિયાન અનેક દુકાનોમાંથી પ્રતિબંધિત સિંગલ યુઝ પ્લાસ્ટિક મળી આવ્યું હતું મુખ્ય વિગતો જપ્ત કરેલ જથ્થો: વિવિધ દુકાનોમાંથી અંદાજિત ૨૨ કિલો જેટલું પ્રતિબંધિત પ્લાસ્ટિક જપ્ત કરાયું દંડની કાર્યવાહી: નિયમોનું ઉલ્લંઘન કરનારા વેપારીઓ પાસેથી પ્લાસ્ટિકનો જથ્થો કબજે કરી સ્થળ પર જ દંડ ફટકારવામાં આવ્યો હતો.ચેતવણી: આગામી દિવસોમાં જો કોઈ વેપારી સિંગલ યુઝ પ્લાસ્ટિકનો ઉપયોગ કરતા પકડાશે, તો તેના વિરુદ્ધ વધુ કડક કાયદાકીય પગલાં લેવાની ચીમકી આપવામાં આવી છે.કાફલામાં જોડાયેલ અધિકારીઓઆ કામગીરીમાં નગરપાલિકાના સેનેટરી ઇન્સ્પેક્ટર હિનાબેન રાઠવા, સિટી મેનેજર ભાવિશા પરમાર, સુપરવાઇઝર ઈકબાલભાઈ મન્સૂરી, નિલેશ વાઘેલા અને સેનેટરી સ્ટાફના સભ્યો જોડાયા હતા. નગરપાલિકાની આ આક્રમક કાર્યવાહીને પગલે નગરના વેપારી આલમમાં ફફરાટ વ્યાપી ગયો છે.તંત્ર દ્વારા તમામ વેપારીઓને પર્યાવરણના હિતમાં પ્લાસ્ટિકનો ત્યાગ કરવા અને પેપર કે કાપડની થેલીઓનો આગ્રહ રાખવા સમજ પણ આપવામાં આવી હતી.